Ég er farin að sjá að ástand eins og ólétta getur laðar að kynlega kvisti. Það var ljóst er við sköturnar komum úr Bónus, Faxafeni um daginn. Rétt ókomin í bílinn gargar einhver vafasamur miðaldra kvenmaður úr aftursæti bíls með rámri röddu: „Rosalega ertu fallega ólétt. Þetta barn á eftir að verða stórkostlegt.“ Ég muldraði takk og hrökklaðist inn í bíl. Þýskar kvenpersónur í formi túrista virðast líka voðalega áhugasamar um ásigkomulag mitt.

Átti góða verslunarmannahelgi, fórum á Flúðir og gistum 1 nótt í tjaldvagni og kíktum í bústað. Mánudagurinn var kózý. Jónas bauð mér upp á Hlölla, sátum og átum í grasinu á Austurvelli í góða veðrinu. Fórum inn í bókabúð þar sem skrítin skrúfa lítur á bumbuna mína og segir við vinkonu sína í barnasuðstón: „Mig langar í kúlu“. Fórum svo í kaffi til ömmu Jónasar. Ég á frídag í dag og á morgun, pabbi kíkti í heimsókn úr sveitinni og var með alveg hrikalega krúttlegt prjónapils handa litlu snúll. Eftir að hann fór fjárfestum í Á. Guðmundsson skrifborðsstól á góðum díl sem við sækjum á morgun. Annars erum við líka nýbúin að kaupa ferlega flotta eldhússtóla í Húsgagnahöllinni á gjafaverði.

Nýjasta breytingin á íbúðinni er að við keyptum 3 snaga til að hafa bak við baðherbergishurðina. Barasta helvíti sniðug hugmynd þar sem plássið þar er nú ekki mikið. Geymsluhurðin fór svo eitthvað að losna, en eins og ég hef áður sagt, þegar maður hefur handyman eins og Jónas þá verða hurðir ekki lausar lengi.

Mín er ekki orðin lítið spennt fyrir morgundeginum, en þá er planið að fara með vinkonu minni upp í sveit að sækja bíl  Mér er sumsé ekki treyst, hvorki af maka, né pápa að rúnta þarna ein í mínu ástandi og Jónas er á kvöldvakt. Var að þurrka af- og týna dót úr bílnum í dag, en hann verður svo bónaður og ryksugaður af Jónasi á morgun.

Við pabbi erum sem sagt að fara að skipta á Toyotum, ég fæ Rav-inn hans og pabbi fær Corolluna mína og svo borga ég á milli. Kostakaup í kreppunni. Svolítið súrt að skilja við minn gamla trausta bíl sem hefur reynst ó svo vel. Hins vegar verður maður að hugsa til framtíðar og Rav-inn er fjölskylduvænni kostur plásslega séð. Vonandi fáum við dömurnar bara gott veður á morgun, en svo er planið að fá sér ljúfan skyndibita í Hyrnunni eða Hreðavatnsskála

Barnaherbergið er smám saman að verða klárt, myrkvunartjald hefur verið sett upp, kommóða keypt og nýjar hillur settar upp, lánsdót er svo væntanlegt. Annað kemur svo bara smátt og smátt þegar kynið hefur verið staðfest með fæðingu  

Annars er það bara vinna eins og áður, góð heilsa eins og áður og góðir dagar framundan

Unnið er ötullega að því að gera íbúðina okkar meira kózý í dag en í gær. Límdum listann á einni hurðinni á eldhúsinnréttingunni svo nú er hún eins og ný. Brotna ruslagrindin undir vaskinum hefur einnig fengið að víkja fyrir nýrri og hurðirnar í hillusamstæðunni í geymslunni hafa verðið fjarlægðar. Í sumar verður svo móðusjúka eldhúsglugganum skipt út fyrir óskemmdum. Það er munur að hafa handyman á heimilinu.

Öllu meira vesen var þegar hitavatnsrör í þvottahúsinu gaf sig og það greinilega ekki í fyrsta skiptið. Eftir þá upplifun erum við fegin að hafa ekki verið húseigendatryggð eins og grannar okkar. Sjálfsábyrgðin hjá þeim var 70.000 kr. og félögin vildu sem minnst gera. Þvílíkt bull. Við sköturnar redduðum málum, fengum vel gerðan pípara sem rukkaði einungis 4000 kr. á íbúð. Jónas fékk svo sement hjá pabba sínum og fyllti sjálfur upp í gatið. Ætlum að skipta um tryggingarfélag og þá fá húseigendatryggingu. Annað af húsinu er það að frétta er að við létum fella risatré í garðinum, skiptum út einni venjulegri tunnu fyrir endurvinnslutunnu og bættum við snúrum og skiptum þeim niður á íbúðir svo við gætum öll notað þvottahúsið hvenær sem við vildum. Næs.

Það fer svo að styttast í að við pabbi höfum bílaskipti. Nú fær Toyotan mín elskulega að víkja fyrir Toyota Rav jeppling þar sem fjölgun fer að eiga sér stað á Hofteignum. Aldrei (7-9-2-13) mun ég kaupa annað en Toyota. Þvílíkur snilldarbíll, 13 ára gamall og eina sem ég hef þurft að gera við hann í öll okkar ár saman er að skipta um bremsuklossa, rúðuþurrkur, einstaka ljós, viftureim og dekk, s.s. reglubundið viðhald. Svo bara árleg skoðun og smurning. Einu athugasemdir sem ég hef fengið á hann er vöntun á númeraljósi hehe.

Nóg í bili, meira síðar. Hvunær sem það svo sem verður hehe.

Datt svona í hug til tilbreytingar að skella inn einu bloggi, hef ekki nennu í neitt annað í bili. Við sköturnar ákváðum að eyða helginni að Helgarfelli á Eyrarbakka, húsi sem mamma og Haraldur eiga. Jónas hafði pantað borð á Rauðahúsinu um kvöldið, voða rómó. Ferðin upp eftir var psycho því veðrið sem var voða gott í bænum umturnaðist á leiðinni. Við fengum okkur djúpsteiktar pulsur með hvítlaukssósu á Skalla þar sem ég var very surprisingly afgreidd af Magnúsi Jónssyni leikara og tónlistarmanni. Mæli eindregið með pulsunum. 

Kíktum til ömmu í Þorlákshöfn og hittum líka Silju og Mörtu frænku. Við letiblóðin lögðum okkur svo fyrir mat og áttum svo alveg æðislegt kvöld úti að borða. Ég fékk mér nautakjöt og Jónas humar og svo var kúrt fyrir framan sjónvarpið það sem eftir lifði kvölds. Morguninn eftir var svo alveg sérstaklega gammeldags. Jónas sótti morgunmat, ég stoppaði í sokkabuxur og svo lásum við bæði, hann 17 íslensk sakamál og ég óreiða á striga. Á meðan hlustuðum við á messu á gömlu gufunni, en gáfumst reyndar upp á henni og slökktum. Við héldum svo heim á leið en kíktum áður til systur Jónasar, en hún var að eignast litla snúllu fyrir nokkrum dögum síðan. Letilífið heldur áfram til 17.00, en þá erum við að fara upp í Grafarvog að heilsa upp á 35 ára gamlan afmælisdreng og spússu hans.

Nú ætla ég hins vegar að fara að gera heimavinnuna mína, en ég er á Rekspalar námskeiði sem mun hækka mig upp um einn launaflokk. Ekki slæmt það. 

Þá erum við Jónas búin að búa í Hofteignum í nokkurn tíma og okkur líður alveg sérlega vel þar. Erum búin að koma okkur að mestu fyrir, búin að mála og sparsla eldhúsið, ganginn og svefnherbergið. Rest mun bíða aðeins. Eina sem skyggir á sæluna er að sökum þess að allir koparvírar voru fjarlægðir úr íbúðinni erum við ekki enn nettengd eða komin með síma Of dýrt er að pota vírunum aftur í svo nú erum við í endalausu biðinni eftir að einhver komi og græi þetta hjá okkur. Ljósleiðari er því örlög okkar.
 
Alveg elska ég við íbúðina að ekki skuli vera neinir þröskuldar innandyra þannig að þegar maður þarf að moppa gólfið flýgur maður á engri stund yfir alla íbúðina. Elska líka baðið í okkar micro litla baðherbergi. Það er eitthvað svo kózý að liggja þarna ofaní með allt svo nálægt sér. Eina sem skyggir á baðið er að ekki skuli vera hægt að koma fyrir óhreinatausgrind þar.  

Annars er ég er komin í mikið hátíðarskap, langar bara að föndra og jólastússast, sem ég er vissulega byrjuð að gera. Vona að þessi orka endist fram að jólum.

Blogga kannski meira þegar ég er orðin nettengd. Er að ærast á þessu.

Jæja, nú fer heldur betur að styttast í innflutning, með tilheyrandi málun og látum. Get nú bara varla beðið, enda er núverandi íbúð okkar orðin ansi kössótt. Ég man að mér óx svolítið í augum að þurfa að fara að kortleggja næsta dvalarstað. Fannst svolítið mikil ábyrgð felast í því að örlög yrðu ráðin með ákvörðunum sem maður tekur. Sem dæmi væri maður meðvitað eða ómeðvitað að velja leikskóla og grunnskóla barna sinna eftir því hvaða svæðisnúmer yrði fyrir valinu. Ekki að það eigi sérstaklega við um okkur Jónas akkúrat núna.

Einnig velti ég því fyrir mér hvort maður tæki ákvarðanir um að flytja á réttum tíma. Íbúðir eru keyptar og seldar í viku hverri (nema kannski núna í kreppunni). Gæti maður misst af íbúð sem manni var ætlað með rangri tímasetningu? Ég vil ekki meina það, allavega fundum við Jónas það bæði á okkur hvenær var kominn tími til að flytja. Síðan, þegar við vorum búin að skoða fullt af íbúðum var á endanum bara ein íbúð sem kom til greina. Vona að þannig sé það alltaf hjá manni.

Í nótt dreymdi mig risastór Kinder egg og smjörkrem, sem ku boða gott heilsufar og sæmileg þægindi. Á vel við þar sem ég og Jónas skrifuðum undir tilboð af fyrstu íbúðinni okkar saman

Dagurinn var þó ansi strembinn, mætti fyrr til vinnu, skrapp til að skila lyklunum af Melaskóla, við Jónas skráðum okkur í sambúð, fórum í viðtal og ég fór í Háskólann til að laga stundatöfluna mína. Hefði dottið niður af sulti ef einhver hefði ekki gefið mér banana í röðinni. Ætluðum að spara okkur ferð á fasteignasöluna með hjálp faxtækis svo ég yrði ekki alveg frá vinnu, en það gekk ekki svo að fasteignasalinn kom upp í vinnu með pappírana. Eftir vinnu skilaði ég samningnum til íbúðarlánasjóðs. Fór svo með hlussu sjónvarp í Sorpu því nú er unnið að því að minnka geymsludrasl. Sjónvarpið virtist þó með undarlegum hætti sverari en bílhurðin sem hún fór upphaflega inn um, en það komu 2 röskir starfsmenn svífandi sem tóku við farminum. Ég þakkaði fyrir og um hæl var mér svarað: Það var nú lítið, komdu bara aftur.

Hlakka voða til að flytja í nýju kózý íbúðina mína, enda ofursæt, með kostum sem prýddu fæstar af þeim íbúðum sem við skoðuðum. Tvö stór herbergi, rúmgott og sætt eldhús og drauma skápur í svefnherberginu sem þekur heilan vegg og nær upp í loft . Staðsetningin er líka frábær þar sem við erum í göngufæri frá World Class, Laugardalslauginni, nálægt miðbænum, leikskóla og grunnskóla ef maður hefur í framtíðinni hug á að fjölga mannkyninu. Flatlendið þarna gefur manni líka enga ástæðu aðra en að hjóla.

Reynslunni ríkari af fasteignasölum höldum við að við höfum staðið okkur ágætlega, en í raun græðir enginn á að selja, né kaupa íbúð í dag. REMAX aftur? Ónei.

Sumarið er ekki tíminn til að halda uppi bloggi, únei. Yndislegt veður í dag. Hætti hálftíma fyrr úr vinnu og við Jónas gengum Laugaveginn og drukkum café latte og átum kleinu á Kaffi París undir berum himni. Eldaði svo bara sérdeilis fínan gúllasrétt sem ég læt fylgja hérna með. Mikið gasalega er nú ágætt að ramba á góðar útsölur. Við Jónas fórum í Outlet og keyptum 4 buxur á alls 7500 kr. Fórum í Tiger og keypti 2 rúllutertudiska sem einnig má nýtast sem eldfast mót fyrir heitan rúllubrauðrétt á samtals 400 kr. Keypti einnig 2 dúka á samtals 3000 kr í 1928. Er nú hætt, Vont að ég var að frétta af góðum búðum í Chania á Krít, en það er seinnitíma vandamál. 

Búin að hafa það rosa gott, nóg að gera og frá mörgu að segja, hef bara ekki eirð í lengri skriftir.

Gúllas m. sveppasmurosti

500 gr gúllas (svínagúllas)
paprikur eftir smekk
slatti af sveppum (ferskum)
sveppasmurostur
rjómi eða bara mjólk/ca 3 dl (notaði mjólk)

Krydda með salti, pipar, hvítlaukspipar, nautakrafti

Steiki gúllasið á pönnu og set í eldfast mót. Síðan steiki ég paprikuna og sveppina og set yfir gúllasið. Set sveppaostinn og mjólk saman í pott og bræði og helli síðan yfir gumsið í eldfastamótinu. Hita síðan í 20-30 mín í ofni

Gott að hafa borða hrísgrjón og hvítlauksbrauð með.

Ég var hreinlega ekki búin að sjá það fyrir mér hvernig það væri að brenna sig á hraðsuðukatli, enda toppar ekkert upplifunina. Helvítið rést á púlsinn á vinstri úlnliði mínum og uppskar ég 2 skemmtilegar blöðrur. Hef verið öflug í aloa vera smurningu síðan og það verður gaman að sjá hvort sá gjörningur forði mér frá öri. Allavega hurfu blöðrurnar daginn eftir og eftir situr rauðleitt krumpað skinn sem minnir helst á áferðina á nýfæddum rottunga. 17. júní á morgun, kvöldið óráðið og morgundagurinn líka, en klárlega  verður eitthvað aðhafst.

Ætla að elda kínverskan kjúklinganúðlurétt á morgun a´la Berglind Chu á morgun. Sú mæta frú bauð mér einmitt upp á svoleiðis síðasta föstudagskvöld þar sem Jónasinn minn var að vinna. Áður hafði ég farið að skoða nýju íbúðina hjá Auði og Halla, megaflott íbúð í Norðlingaholti. Föstudagskvöldið tók óvænta stefnu þegar Karen bauð okkur Berglindi á Hvanndalsbræður í Iðnó eftir mat, en þó ekki fyrr en eftir að við Chu höfðum farið í eitt stykki ísferð, ótrúlega hressir gaurar þessir bræður og keyptum við allar diskinn.

Orð dagsins:

"Í samtalinu lýsir Davíð baráttunni við krabbamein frá því að hann fann fyrir miklum verkjum í kviðarholi að kvöldi 21. júlí 2004. Á leiðinni á sjúkrahúsið þetta kvöld fann hann „óþægilega fyrir öllum hraðahindrunum sem hann hafði samþykkt þegar hann var borgarstjóri“." 
                                                                                                        mbl.is 12.06.2008.

Það er húmor í kallinum, ef ekkert annað hehe.

Ekkert svo sem blúsað við daginn í dag, nema ef vera skildi fyrir óvenjulega vondan mat á spítalanum í hádeginu, en hver er ég að væla yfir einhverju svo fjarri nútímanum :þ Salatbarinn er því veruleikinn hjá mér. Ég hef, ótrúlegt nokk, fylgst með af þó nokkrum áhuga á fótboltann, án efa er ég undir áhrifum frá ákveðnum sambúandi einstaklingi á heimilinu. Ég gleðst þó yfir að það séu bara Heimsmeistaramótin og Evrópukeppnirnar sem heilla. Gaman að löndin sem fæstir gera væntingar til eru að standa sig eins og hetjur. Austurríkismenn voru góðir og Hollendingar báru af með sjálfstrausti og sóknargleði. Ég horfi á engan leik haldandi með ákveðnu liði, fer allt eftir því hvernig liðin spila. Þoli ekki hægan fótbolta og lið sem þorir ekki að taka áhættur og leggja áherslu á vörn. Það sannast að líkt og með okkur Íslendinga, sem ekki erum upp á marga fiska í fótbolta, geta allir spilað með hjartanu. Reyndar spiluðu Austurríkismenn og Hollendingar bara hreint út sagt vel, gáfu boltann vel, héldu honum vel og stóðu sig með prýði.

 

Ég fékk vægt taugaáfall þegar ég fór í fyrsta skiptið á LSH vefinn eftir að hann hafði gengist undir andlitslyftingu... andlitslyftingu sem mistókst. Við mér blasti ég sjálf, sem sérlegur starfsmaður LSH sem var undarlegt í ljósi þess að ég hef aldrei farið í starfsmanna myndatöku þarna og ekki var þetta debet kortamynd og svo sannarlega ekki passamynd. Ó nei, um varð að ræða einhverja hrollvekju frá því ég var x –tján ára og ég kannast engan veginn við að hafa setið fyrir á henni. Spúkey svo ekki sé meira sagt.

Eníhú, kózý helgi senn að kveldi komin. Við hjúin eyddum stórum parti af gærdegi (belgfull af KFC þrennu) í Hafnarfirðinum í tilefni afmælishátíðar áðurnefnds staðar. Við röltum um bæinn, drukkum fríkeypis vatn, skoðuðum m.a. Siggukot, götumarkaði og þjóðmenningar bása. Fórum í foreldraheimsóknir og kíktum á tónleikana á Víðistaðatúni áður en við héldum heim á leið. Í dag bakaði ég kryddbrauð sem við borðuðum áður en við héldum niður í bæ. Góð tímasetning því Valgerður, systir Jónasar kom ásamt börnum að sækja bíómiða.

Ég varð eiginlega gáttuð yfir hversu lítið var af fólki í bænum í dag. Við fórum þó í eina siglingu sem var voða fínt, fengum okkur kaffi, en rokið var svo mikið að ég hélt að við myndum svífa frá borði. Kíktum á ömmu hans Jónasar, henni fannst hann svo sætur með nýju gleraugun að hún sagðist bara verða feimin hehe. Komum við í Kolaportinu áður en við héldum heim, fengum smakk úr girnilegu fiskborði og enduðum með að kaupa okkur fisk í sósu, rituegg og blandað sjávarnammi í fiskisúpu. Nú er bara að fara að elda.  

Ég held að það verði að viðurkennast að ég er ekki mjög meðvitaður jarðskjálfta þolandi. Var stödd í vinnunni þegar umræddur skjálfti brast á og var ég mjög skemmtilega stödd á klósettdollu staðsett í hálfgerðu kústaherbergi. Ég horfði á spegilinn, sápurnar og sprittið sem hékk á vegnum fyrir framan mig nötra og hristast og ég hugsaði pollróleg núnú bara jarðskjálfti. Það skal viðurkennast, af minni hálfu, að eftir á að hyggja hefði ekki verið spennandi að finnast á slíkum stað. Síðan rölti ég í næstu lyftu til að setja kirsuberið á ístoppinn. Mér var því illa brugðið þegar ég sá fréttirnar, var engan veginn að gera mér grein fyrir ástandinu. Lán í óláni eru tímasetningar þessara skjálfta, flestir í vinnunni og börn í leikskóla þar sem ekki er mikið um háa hluti sem geta fallið. Hrollur.

Sjúrnall vikunnar: "Fölar slímhúðir. Með velbleikan varalit á vörum."

Ég varð fyrir hárskerðingu seinnipartinn í dag, m.ö.o. fór ég í klippingu. Smá bylting í gangi, lét sníða á mig hár sem ég hef ætlað að fá mér frá því síðan fyrir óþarflega mörgum árum. Gaman að því. Allt flott að frétta þó almenn bloggleti svífi yfir sauðkindum.

Allt rjómandi að frétta úr vinnunni, ávallt gullmolar sem fylgja þessum blessuðu sjúrnulum.

Tóndæmi:

• Augun eru blá á gulum fleti eins og í sænska fánanum.  
• Meig eins og reiðhestur.

Verð að segja eitt skondið. Dreymdi eina nóttina að yndið mitt væri voðalega leiðinlegur við mig og vaknaði ég upp ferlega óhress. Vældi í Jónasi yfir framkomu hans í umræddum draumi og Jónasinn minn muldraði utan við sig: "Fyrirgefðu" og faðmaði mig hehe.

Komin heim eftir yndislega helgi í sveitarsælunni í Borgarfirðinum. Var, sem svo stundum áður, að passa 16.000 kjúklinga, plús dyntóttan hund er nefnist Dúlla. Dramatíkin hófst strax við komu okkar á föstudagskveldi þegar pabbi tilkynni að neyðarsíminn hefði hringt og að rafmagnið hefði slegið út hjá kjúllunum. Við redduðum því, en þar sem fuglarnir höfðu orðið fyrir hitatapi dóu fleiri en ella.

Á laugardeginum gengum við að Glanna frá Svartagili, á sunnudegi fórum við upp Grábrók og síðan aðra leið að Glanna. Pabbi gaf okkur frjálsan aðgang að sexhjólinu og pallbílnum, hið fyrrnefnda var þó efst á óskalistanum. Keyrðum um sveitina á laugardeginum, ekki amalegt þar sem veður var gott, fyrir utan nokkra regndropa. Hápunktur ferðarinnar var þó á sunnudeginum þegar Jónas fór með mig á sexhjólinu upp fjallið fyrir ofan Svartagil þar sem blasti við foss og stöðuvatn sem ég vissi ekki að væri þarna.

Skiluðum okkur í bæinn á mánudegi, Jónas fór til vinnu, en ég í grill hjá mömmu og Haraldi, gengum um Gróttu eftir mat og skoðuðum draumasvæðisnúmerið mitt, húslega séð. Frábær fríhelgi í alla staði. Dagurinn í dag var einnig kózý, hitti Hörpu vinkonu eftir vinnu, löbbuðum heiman frá mér á kaffihús þar sem við súpuðum íste og ískaffi. Soyabuff í kvöldmat var svo viðeigandi eftir matgóða helgi... fyrst Jónas var í vinnunni. Tókst að elda brauðristina hans í leiðinni. Ekki spyrja.